"O Comité Galego de Xustiza Deportiva exclúe do censo electoral
a 15 das 20 escuderías recurridas.
Antonio Rodríguez Troitiño afirma que “Iván Corral
está cada vez máis acorralado” e salienta que esta resolución
“é unha bofetada á dirección da FGA e, especialmente,
á Xunta Electoral, que debería ser imparcial e obxectiva”
O grupo de Xeración-RenovaFGA aínda valora a posibilidade de
recurrir ao contencioso-administrativo por estar “en desacordo”
coa admisión de varias das cinco escuderías aceptadas
O Comité tamén acordou levantar a suspensión do proceso
electoral e ordear a súa continuidade “conforme o previsto na norma”
“O pleno do Comité Galego de Xustiza Deportiva (CGXD) acordou
estimar parcialmente os recursos presentados por Antonio Rodríguez Troitiño
e Alfonso García Eiriz contra a inclusión “irregular”
de 20 escuderías no censo provisional elaborado pola Federación
Galega de Automobilismo (FGA) e resolveu excluír a 15 desas escuderías
por incumprir os requisitos establecidos no Regulamento Electoral para poder
votar.
As 15 escuderias excluídas son Amigos do Motor, AKFM, Squadra Racing/Club
Trukart Motorsport, As Burgas, Fraguas Sport, Taboadela, Amoeiro, Boxes Competición,
Historic Motorsport, Team Medical, Gonzasport Competición, Segade, Sohers
Competición, ACSM Rally Team e AMF. Pola contra, as outras cinco escuderías
que o CGXD considera aptas para figurar no censo electoral son Miño,
Galaica de Eventos, Sermovil Barreiros Competición, Amsport Rallye Team
e Charli Romeo.
O voceiro de Xeración-RenovaFGA e futuro candidato á presidencia
da FGA, Antonio Rodríguez Troitiño, considera que tras esta resolución
do comité “Iván Corral está cada vez máis
acorralado”, xa que é “unha bofetada á actual dirección
da federación e, especialmente, aos integrantes da Xunta Electoral, que
deberían actuar con imparcialidade e obxectividade e non adoptando a
sabendas decisións contra a norma para favorecer claramente á
candidatura do presidente”.
En relación ás cinco escuderías que foran recurridas e
que o comité admitiu, Rodríguez Troitiño sinala que no
seo de Xeración-RenovaFGA aínda se está a valorar a posibilidade
de presentar un recurso contencioso-administrativo porque “polo menos
hai tres casos das cinco escuderías que parecen máis que discutibles
e cos que estamos en desacordo”.
Continuidade do proceso electoral
Por outra banda, o Comité Galego de Xustiza Deportiva tamén decidiu
levantar a suspensión provisional do proceso electoral e ordearlle á
FGA a súa continuidade “conforme o previsto na norma”. Neste
senso, Antonio Rodríguez Troitiño agarda que a FGA e a Xunta Electoral
“aclaren o antes posible en que modo afecta esta exclusión de 15
escuderías ás porcentaxes dos diferentes estamentos e, sobre todo,
aos prazos establecidos no calendario electoral”. “Entendemos que
o prazo de solicitude de voto por correo deberá ampliarse ao verse interrompido
pola suspensión do proceso electoral”, sinala.”
