Poderán conducir tres vehículos o venres 8 de setembro no paseo da Madalena, acompañados de especialistas neste transporte “verde”.

A iniciativa promovida pola Concellería de Medio Ambiente conta co respaldo de firmas como Nissan, Mercedes Benz ou BMW.

Cabanas, 4 de setembro de 2017.

O Concello, a través da Concellería de Medio Ambiente, invita a coñecer as vantaxes do coche eléctrico nunhas xornadas que terán por escenario o paseo da Madalena. Celebraranse o venres 8 de setembro, entre as 17 e as 20 horas. Alí, veciños e veciñas poderán probar un dos tres vehículos que o Concello pon á súa disposición grazas á colaboración das firmas Nissan, Mercedes Benz ou BMW.

Acompañados dun especialista neste tipo de turismos, veciños e veciñas poderán conducir os vehículos, comprobando os seus beneficios, ademáis de recibir as explicacións correspondentes sobre o seu funcionamento. Darán conta das razóns polas que o coche eléctrico é un medio de transporte “verde”, moi respectuoso co medio. Dunha banda, ó non depender de combustibles fósiles e, doutra, polo seu nulo impacto acústico e cero emisións á atmósfera.

Superadas as limitacións en canto a autonomía e potencia coas que naceu, trátase dunha opción ecolóxica que día a día gaña usuarios. Así mesmo, a ese respecto medio ambiental súmanse tamén factores positivos para o propietario, como o aforro económico respecto a aqueles que precisan de combustible e o menor mantemento.

Así mesmo, lémbrase que este tipo de vehículos contan en Cabanas cunha bonificación no imposto de rodaxe do 25%.

Saúdos, Gabinete de Comunicación.